ثورة بيبى

احسن حد يفتكرنى بتكلم عن ثورة قام بيها اطفال رضع والا حاجة

ههههههههه

انا بتكلم عن ثورة على الملك ((بيبى))

وهوا فعلا اول ما مسك الحكم كان بيبى

كان لسه عيل صغير عنده 6 سنين  يعنى تقريبا (كى جى ون )وكانت امه وصيه عليه على ما كبر وفهم

بدا زى الفل وكان بيرسل البعثات الحربية وكان ملك منتصر   

الناس كانت بتحبه فى الاول

بس مع ذلك كان ضعيف الشخصية امام   حكام القاليم  اللى هما محافظين حاليا

بيبى حكم  94 سنة

(عشان اللى بيقولوا ان مبارك اطول فترة حكم يعرفوا انهم بيظلمو الراجل)

 بعد ما كان بيبى  ملك قوى  وشاب فى ريعان شبابه

بس للاسف الشباب ما بيدومش بقى

كبر وعجز وبقى مش قادر يسيطر ع البلد

ولاجل حظه الاسود  حصلت مجاعة فى البلد وشوفو بقى مجاعة وفساد
يا نهار

 دا غير ان حكام الاقاليم اصلا امتنعو عن اداء الايرادات لخزينة الدولة

والحكاية بقت ميغة وفوضى وناس كتير  ماتت من الجوع فعلا

وكالعادة اول من بيتاثر باى خلل فى الدولة الغلابة

اللى هما  الفلاحين والعمال

بسبب قلة المال السفن توقفت عن جلب الخشب من فينيقيا والناس زمان كانو ابهة بيدفنو موتاهم فى توابيت وبسبب عدم وجود التوابيت دى  بقت الجثث تلقى فى النيل   ومعنى ان الجثث تلقى فى النيل ده دليل على الانهيار الاخلاقى اللى ساد ايامها لان النيل كان مقدس بالنسبة للفراعنة

الكهنة كانوا بيخوفو الناس الناس من الخروج على الحكام وكانو بيقولولهم ان الصبر هيكون جزاءه كبير عند الاله بعد الموت وكانو بيشغلو الناس  عن حاضرهم بنهايتهم

كان فيه نظام اقطاعى ايام بيبى  الاعيان والكهنة وحكام الاقاليم كانو يملكو تقريبا كل شئ والفلاحين والعمال كانو بجد بؤساء

بدء عدم الاحترام يترسب لقلوب الناس

لا يحترموت الملك

لا يحترمون حكام الاقاليم

لا يحترمون الاعيان

والاكبر

لا يحترمون الكهنة

الناس صبرت

وصبرت

وصبرت  لحد ما زهق الصبر من صبرهم

واللى كان يشوف الحال كان يقول ان ده شعب راضى بالذل

ويستاهل اللى يجراله لانه  شعب ميت

بس بعد فترة

الناس عملت ثورة

ثورة  فى عصر الفراعنة!!

ايوة ثورة فى عصر الفراعنة 

طب ازاى؟؟!!

اقولك ازاى

عصيان مدنى

ما تبصش وتبحلق كده ايوة عصيان مدنى

الناس عملت اضراب عام شامل فى كل البلد  واعتصمو فى اكبر  المعابد اللى هى بتساوى الميادين عندنا دلوقتى

حاجة كمان فاكر الشباب اللى كانوا بيضربوا ع البوابات ايام الثورة عشان يعملوا اصوات عالية وتنبيهات

زمان كان الشباب بيطرقوا ابواب المعابد عشان الناس تنتبه وتنضم ليهم

فى النهاية استجاب الملك لمطلبهم

وساد بعدها فترة حكم عادل

استمرت حوالى الف سنة